29.-30.09.2018
Am Wuchanend vom 29. -30. September 2018 hend 12 Turnerfründa vo da Aktiva ihres aljährlicha Reisli atretta. Da`s natürli wider as Rätsel gsi isch was z Programm isch, heds mehreri Spekulationa geh. Zwar hed d Packlista mit Hüttaschlafsack, Wanderschuah und Badhosa afa a grobi Richtig vorgeh.Vo Igis us hed d Rhb alli zema richtig Albula beförderet, gnauer gseid bis uf Bergün. Nach ma churza Spaziargang hends de mit am Darlux Sässälilift chöna di ersta paar hundert Höhameter bequem hinter sich bringa. Vo döta sinds mit supper Ussicht am Panoramaweg bis zur Alp Digl Chants gfolgt. Bis döta sind alli 12 Wanderfründa no guat gluunt und wohl uf gsi. Hinder dr Alp heds de dr Wäg nümma so guat mit na gmeint und isch einigi Grad steiler worda, was de au drzua gfüahrt hed das d Motivation und z Tempo nümma bi allna glich gsi isch und sich di ganzi Gruppa gspalta hed. Während di einta scho vor dr Keschhütta as Piarli zwitscharat hend sind anderi no dra gsi d Berggipfel in dr Umgebig z bestimma.
Vorem Znacht hends de no herrli Zit ka zum bi dera hübscha Ussicht a Jass z chlopfa. Wohl gnährt mit Spies und Trank sind dia 12 nach da obligatorischa Rundana jassa meh oder weniger glichzitig ind Fedara.
«Usgschlafa» und mit ma usgibiga Zmorget sinds no vor Sunnaufgang richtig Sertigpass losglofa. Verbi am Piz Murtelet und da Ravais-ch Seea hends dr Sertigpass erreicht. As paarna isch d Erlichtarig au scho vo wiitem ah z gseh gsi. Mir frischer Motivation hends denn auno di letscht Etappa unter d Füass gno. Zerscht isch dr Wäg rächt steil und speter flach taluswärz bis zur Busshaltestell im Sertig ganga. Füf vor Gruppa hend sich no entschieda mit da Trottinet d Sertigstrass unsicher z macha. Z Davos acho hend sich dia 12 Fründa wieder troffa und sich uf da Wäg ins Eau`la` la gmacht, zum ds diesjährigi Reisli usklinga lah. Nach mehrera Stunda ihweicha und suuber wia sit Wucha nüma hed sich das Grüppli tüüfaentspannt ufd Rückreis begeh.
Wieder zrugg z Igis hend sich denn dia fitta Staiböck- und Gäissa mitma zfriedna Lächla im Gsicht uf da Weg ins wohliga Dahai gmacht.
